من ديوانى عشان حرام
شعر :
أمينه عبدالله
...........
1
السياحة فى جبال جسمى
عشان خاطر
إن أنا أطيب منك
لاحلم لك
بالسياحة،،الونسة ،الحج.
السياحة
ف جبال جسمى
ح تعرف منها
ربنا قد إيه بيحبك.
الونسة
ف مفرداتى
اللى مش عند حد
غيرى
الحج
لكعبتى
والتبرك بكسوتها
اللى قماشها محبتك.
عشان خاطر
إن أنا أطيب منك
"ببسمل مرتين"
أصلى مرتين
واشرب كتير
عشان ما تبقاش بتسكر
لوحدك
2
حمام بارد
حاجات
بتحسها،وما بتقدرش تحددها بدقة
زى الاحساس بالقهرة
ما بتبقاش عارف
هو ألم فم المعدة
اللى بينتهى بقىء دموى يخليك وديع !
ولا الاحساس
بالخوف
اللى بيجيب لك سخونية
وخطرفة عقلك الباطن بأحلامك
ومخاوفك
أما إحساسك
بالبكارة
ما بتبقاش عارف تحدد
هو فرحة حدوث
أول الأشياء
وفزعتها
أو حسرتك على تجميع آخرها
مجرد حاجات
بينتهى
إحساسك بيها
بعد تقليبك ف سرير كبير
وأخد حمام بارد ف آذان الفجر
بعد كدة
قراءتك لمشهد بلقيس وهى
بتمد رجليها خايفة م المية
تنام ،وانت بتحلم تقابلها ف لحظة النهار
اللى طلعته
نفس اللحظةدى
ح أكون
انسحبت للأبد
بحاجات عرفت أحددها
كويس !!!
واشرب كتير
ردحذفعشان ما تبقاش بتسكر
لوحدك
اولا اشكر شاعرنا الكبير على اهدائنا هذه الرائعة
ثانيا هل هذه وحدة ام توحد وتماهى فى الحبيب
شرفت بك صديقى
ردحذفكل الود