قصائد
للشاعرة منال الصناديقى
...........................
هـــــــــــــــــدوء
******
طيبى .. قلبك
قبل إنصهاره بينك وبينك
أخطفى نبض انتصارك ع الألم
واجرى بيه
اشعلى عينى بفرحك
أصلى ليلك طير بيحفر جوا عمرى انكسار
بس ضِحكك نيل وعامل من ضلوعى مسبحة
وأوعى يوم..
تشرخى شط الكلام
تردمى فيكى الخَضَار
تسرقى من فرع فجرك شىء غميق
دا انتظار النور يولّد فى عروقنا سوسنة
لكن الدموع ما كانت روعة أبداً ف اللحاف
دى الدموع دايماً بتغرس فى قـُليبنا شوك سخين
وانتى علمتينى أبدر شوكى عندك يبقى توت
تُلقطه عنينا يطرح ضى رعشة من حنين
لكن المرة دى طارت رعشتى صبحت أنين
والبلاط رشرش عتابه من قِدامى حد فوق
أصله شافك راح مصاحب طرحة صافية م السما
وأما شافنى شد قلبى ورمانى للفراغ
قال دا عمرى ماهبقى ليه نجمة تستاهل وصول
وأما عينى تنفلت عند ايدين البيبان
اسحبى أملك وطيرى بالرياح
اجذبى حلمك ومدى للبراح
ادى روحك.. ارتياح
ادى روحك
ا.ر. ت. ي. ا. ح
**********
بــــــــــــــــــــــــراح
.......
يا حيطان الكون خُدينى
لفى ايدك. سندى نبض العيون
اجرى فيّا. اشربينى
جففى عمر الشجون
دغدغينى بالخطاوى الضحكتين
وارشقينى نجمه فى صدر الجنون
----------------------------
رشرش عيالك يا ندى بالأسئلة
وارسم بيبان تعكس لنا ضى الكلام
خُضرة وسما
تفرش لنا جسر وطريق بينهم فضا
والفضفضه جوانا شوق
نهر وشروق
شجرة ومدى
واللوحه ف الأصل اندماج
البسمه نور
ادقدقت جوانا جور. لحظة محن
لكنا بادرين الرجوع. رغم العُفار
ننقش ليالينا نهار
ننبت تمرد. ازدهار
مروى بريق فرح الصِغار
طعمه.. وطن!!
****
سفسطات من روح التخابيط
.........
لما القِـــلام النونو بتكاكى
مــا تنزعجش
قلمى .. بقرش
وف سوق يومه
مـا يـ سـ و ا شـ ى
حبة حمول
ساكنة ف نبض القاعة اسرارى
وهوج رماد المِقلة واتندى
زيت الألم ذَلـــِّــنى لهيب طَعمُه
إنقع مراره وحُطُه ف الشفة
وهاتلى نضارتى واتشفى..
بضحك العجايز
ـ يا سر كونك المجنون بحلقاته
ـ برجلاتك يا ست واحدة بين عدد
إرمى سحرك وانسندى
على كل ملامس الدمور
ماشية تلخبطى فـ السطور
بسحاب ..
يشبه قناديل السلاحف
شرشرى غـَطـَاكى سكة لحاف
ماهوش مكرمش عـ البدن
زكه اليمين ليلاتى تعدلى فيه
فيطلعله بُوزين
ـ غيظ ابنك اللى ضحكته
متنطورين من راسك
اللى زى طوب
مبينخرطش
إلا حبوب بتكب منك
نار تبستر فـ الوداد
سفــــــســـــطة أخيـــــــــــــــــرة:
- مش عارفة كل مأبلع دموعى
التقيهـــــا بــرايــــــا
يا ترى المرايـــــات
حطـــــــت ع الــــــقــفا
ولا العــــفـــن شـــادد حيــــله
ليست هناك تعليقات:
إرسال تعليق
أهلا بكم..
أشرف بتعليقاتكم..
محبتى