--
* الشاعر / وحيد وصفى محمد السعيد .
* يعمل رئيس قسم ببنك قناة السويس .
* شاعر عامية .
* عضو اتحاد كـُتـَّاب مصر.
* عضو أتيليه القاهرة .
* عضو جمعية دار الأدباء .
* عضو رابطة الزجالين و كتاب الأغانى .
* عضو جماعة الفجر الأدبية .
* عضو نادى الأدب بقصر ثقافة بهتيم .
* نشرت أعماله بالعديد من الصحف و المجلات و النشرات الدورية ، منها :
الدستور – المصرى اليوم - روز اليوسف – الشعر – الأنباء الدولية – العمال – النشرة الدورية لاتحاد كتاب مصر .
* شارك بالتجهيز و التنسيق لفعاليات المؤتمر الأول لشعر العامية باتحاد الكتاب عام 2010 .
* له جروب نشط على الإنترنت ( أحباب الكلمة ) .
* ساهم فى إصدار و مراجعة العديد من دواوين الشعر بالعامية و الفصحى لشباب الشعراء .
* قدّم العديد من الشعراء الشباب للوسط الأدبى من خلال :
1 – إذاعة البرنامج الثقافى .
2 – قناة النيل الثقافية .
3 – ندوة شعبة العامية باتحاد الكتاب التى أدارها على مدار عام 2010
* صدرت الطبعة الأولى لديوانه الأول ( كلمات من دفتر بايت تحت المطره ) عام 1991 .
* إنقطع عن الأوساط الأدبية من عام 1994 و حتى عام 2007.
* فى عام 2008 صدرت الطبعة الثانية لديوانه الأول .
* و تبعها فى نفس العام ديوانه الثانى ( على حِجْر بُكره )
و هو الديوان الفائز بجائزة مسابقة دار الأدباء عام 2009 .
* فى عام 2010 صدر ديوانه الثالث ( نـَفـَس دافى )
* للشاعر تحت الطبع ديوانان من شعر العامية:
1 - ( أشعة مقطعية على الروح) .
2 - ( شويتين رومانسية ) .
- قصائد بالعامية المصرية-
قـَمَر على وشّ المَيَّه
يا حتـِّة تلج
بتدوب جوّه حبة شاى
أغنى لِك
بدون ما اشرب .. و اصُب .. ازاى
و اصوم ازاى
و انا سحورى حِفان مَيَّه
و اسوق بيكى ..
و انا عيونى مغمِّية ؟
بالاقيكى قمر طالع
فى ليل روحى
و نور باشتاق له
كل ما ادوب فى أحزانى
يا رحله طويلة واحشانى
.. أقول لِك إيه ؟
و اطير إمتى
و انا ريشى زَغـَب لسّاه
بانـَقـَّر فى الشجر .. و ابكى
و اخاف م الوقت يسرقنى
تعالى ف حضنى .. و اتفـَكّى
وحشتينى
سنين جاية وْ سنين فاتت
يا ماليانى بملامحك
لو تصدينى .. حاغنى لِك
و اطير للدنيا من نيلك
جناح مكسور
لكن قادر .. يعدى لِك
و مين قال ان انا حافضل
بقية العمر باتلـَفـِّت حواليكى
و ادوَّر ع الطريق نفسه و ما القاهشى
حاجات فرقت معايا كتير... بالاغيها
و لو عِصْيت على التفسير ... حالاقيها
و حاتحـَمـِّل عذاب طيرى بْجناح مكسور
لكن عمرى ما حاتحمل
عتابك ع الوجع و الشوق
ما يجرحنيش سوى جرحك
و لا بابكيش عشان نفسى
دا انا باعشق ترابك
لما من صغرى
و ما باحلفش غير بيكى
فلما القاكى محبوسه
فى حضن غريب
ما تسألينيش على بكره
... و لا امبارح
و لا تحاوليش بحبة قمح ترضينى
دا حتى القمح مش مزروع فى أحشائك
خطوط الخوف بتتنطط فى أوراقك
لسانها فى وشِّى كان طالع
.. و باستحمل
و احايلها .. و اسامرها ..
و بالعب فى ضفايرها
و اقول :
كام يوم و راح ترحل
و ترجع لى الأصيله
.. غيطان
يطول الليل .. أخاف و اجرى
و بارجع لك فى عز الضىّ متعافى
و لا تخافى
حاشيلك .. لو على اكتافى
و ادور بيكى على الحُكما
.. ما ينصفونيش
و من ريقى اللى شارب ميّتك
حاقدر أداويكى
و يكبر حضنى .. و يساعِك
.. يداريكى
أشيل قلبى اللى كان ملهوف
و اهنِّن فيه
و ادوَّر بيه على قدرى
و طول عُمرى .. و انا شايلِك
حابُص لفوق
إسترجل
إمسك كـُبَّايتك بإيديك الاتنين
يمكن تتدَفـَّى
تـَبِّت عَ الأرض برجليك
حاسب تِتكـَفـَّى
حِب الناس من قلبك
و احلم
ما تمَيِّلش فْ لحظـَه الدَّفه
إرمى عينيك لبعيد
حتشوف الشـَّط
إعدِل راسك
و اوعى تميل فى إيديك الكـَفـَّه
طول ما ميزانك عَدْلـُه فْ إيدَك
عُمر ما حَدّ حيقدر يتحكم فى مصيرك
و انت بنفسك حتحِسّ الفرق
ما بين كونك تابـِع
و انك تزرع غيطك بإيديك
تبـِّت ع الأرض برجليك
تلاكيك
تَعْبان و مهزوم بالقـَوى اكـْمِنّ السَّــما
قَعَدِت على دْماغى و بدأت تِشْتِكِــــى
من قـَد إيه الكلمـه خايــفه لـَتِنـْفِلِت
و لحـــد فين قادْره الحواديت تِتْحِكِـى
يا طَيّبه .. مِن قبل ما رْموشِــك تِدُوب
بتسيبى فـَرْحِك ليه و جَرْحِك تِمْسِكـى
فين ابتسامْتِك لـَـمّا كـُنـّا صْغـَيَّرين
و فين غُناكى .. اتْكَلـِّمى و اتـْحَرَّكـى
إياك تموتى دا انتى سـندى و فـَرشِــتى
و انتى اللى كنتى ف ضــحكتى بتتمحكى
فاكْرَه المواويل اللى قـُلـْناها سَـــوا ؟
إزاى يا شابـَّه تيجى جنبى و تـُبْرُكِــى
حِيْرتِك أنا و انتى اللـى حَيَِّـرتى الوجود
أنا باجْمَعِك فازّاى بَقـَى تـِتـْفـَكـِّكِـى
و ازاى تغيبى و انتى تاجى فى الحضور
طب مش تقولـــى و بعدها تِتْلـَكـِّكِى
و الا انتى غاويه تعيشى طول عمرك كده
فارشه الدموع فيضان لحد ما تملـُــكى
غنوة عذاب
فى كل حـــــــدوته دمــعه
و لكل ظــــــــالم ضــحايا
جاوبينى لو كنتى ســامعه
مين اللــى دارى الحــكايه
و مين صــبغ توبــك احمر
و مرمــــغك فى التــــراب
هزى القلوب و اما تعمر
غنوتــــــــها حتكون عذاب
يا صــــــابره ضمينى ليكى
شــدى النفس من ضلوعى
و دوبــــــينى ف عينيــــكى
ورينى ســـــــــكة رجوعى
صباح الخير
صباح الخير على وَرْدِك
على قمحِك .. على غيطانِك
صباح الخير على فـَجْرك
على ليلِك .. و سجَّانِك
صباح ما يْشوف شموس غيرك
و انا و حبايبى نتمَرَّغ على أرضِك
و انا و عيالى نتربَّى على خيرك
صباح الحلم يملانى
لحد الليل ما ييجى وَ انام
وَ اعيش الحلم من تانى
مع عينيكى فى أحلى كلام
أناجيكى و الاغيكى فى أحلامى
و فى صَحْوى لـُقا و سْكوت
و مهما تغيبى عن عينى
بتِمْلِى كيانى وَ القانى باحبِّك موت
صباح الخير يا ورده جميلة
بـِتـْفـَتـَّح على الدنيا
و بتغنـِّى بأجمل صوت لِعصفوره
كاسيها الريش
و عايشه الشوق
ليوم أحلى من امبارح
و شمس تـْدَفـِّى و ما تِكـْويش
صباح مليان ندى يروى
وَرَق حَرَّان لِشجرة عجوزه عايزه تعيش
صباح طارح ضِيا وَضـَّاح
ينـَوَّر سِكـِّة التـَّايـِه
ويهدى العاصى و الحيران
و تدخل جُحْرَها الخفافيش
مـِن حـَكـَم فى مالـُه
مِش بـِتَاعِة حَدّ فينا
شوك غريب
نامى ما بين
إيدها و إيدينا
لو حاولنا ف يوم
نـِحُوش غَرْقِتْها
... نغرق
و ان قِدِرْنا
... بَقِتْ بتتطاول علينا
نلتفت ...
نلقاها حاضنه حد غيرنا
تنفلت كل الدموع
اللى ف عينينا
خايف من الفوقان
باغيب علشان ما احِسِّشْ
البيبان مفتوحه
باتشجَّع
..... ما اخُشـِّشْ
التراب اللى السنين
مليانه بِيْه
تحت منها السوس
- بـِغـِلـُّه -
كان مِعَشـِّشْ
قسموها بينكو
و اللى ف يوم باعوها
بالدموع و الدم
مش حيرَجَّعوها
يمكن الأيام ترَجَّع حاجة منها
شـــوكة
تِنـْغـُز فى ضمير اللى باعوها
حِمْل مِتـْعافى
فى ظـَهر اللى اشتروها
و اشتروها ازاى
و هىَّ اللى ف ضميرنا ؟
يعنى ليهم جُوَّا مِنِّى
حِتـَّة مِلـْك ؟
إِنْهـِى حِتـَّة
اللى امتلكها اللى اشترى؟
راح ياخُدها مِنـِّى
بالخوف يا ترى؟
و الا راح يمنعنى اغـَنـِّى؟
طب حاغنى ....
غصب عنـُّه
و غصب عنى
و اللى باع
يرجع فى بيعتـُه
و اللى شال
يخسر بشيلتـُه
توتة
بتتشكل حروف إسمك
شجر ريحته كما الياسمين
و أغصانه بتتمايل
يروح قلبى فى مرجيحة
بميت وردة
ما فيش و لا شوكة تجرحنى
أغمض عينى ..
و اتمرجح مع قلبى
كأنى جديد على الدنيا
و خايف اموت
و بحرك يملا أنفاسى
بميت غنوة و حدوتة
ما فيش و لا كلمة توجعنى
أسيب نفسى
و اشقلب روحى ويا الموجة ..
و اتمنى
يكون بكره اللى جاى أحلى
و اموت مبسوط
و كل ما انام
أو اسهى ثوانى
بالقاكِ
بتاخدينى
فى ليلة جميلة وياكِ
و نرتاح فوق شطوط ..
مخلوقة علشاننا
ما فيش فيها ..
سوى ضليلة تجمعنا
و شجرة توت
عصير سايل ..
من الشجرة على وشى
فاتح لك بوابات قلبى
اهجمى و خشى
بنيت لك فى السما عشك
و فين عشى؟
ما تاخدينى على سطوحك
أخبى علىَّ و أبوحك
دا انا طيرك
و مدبوحك
يا توتة خدينى وياكِ
أزور الشمس نص الليل
و ادوب فيكِ
عينىَّ تكون فدا عينيكِ
و عمرى يكون فدا لحظة
تعيشيها بلا أحزان
و طول عمرى ..
أعيش واقف على بابك
أكون راجلك ..
و اكون حرسك ..
و أحبابك
و ضليلة تكـَفـِّيكِ
ساعات تقضيها فى ظلى
أدوب كلى
و شمس الدنيا ما تغميش
سنا عينيكِ
باموت فيكِ
و احس الدنيا أحلى كتير ..
و انا ف حضنك
دفاكِ ف طوبة يملانى
طراوة شطك الممدود ..
فى عز الشمس ..
خلانى باقول تانى ..
يا شجرة توت
بتطرح كل ما اشوفها
باحبك موت
النصيب
إزاي قادر بس
تـْبُص ف عينها
و انت ما خـُفتِش مَرّه عليها
حِتـِّة عَيـِّـل
مش عارف تاخد بالك مِنـُّه
سقف و حيطه و باب
لـُقمَه بْدُقـَّه
قـُلـِّة مَيَّه
كوز و حصيره
وْ طِشـْتِ نـْحاس
و حِرام
حتى اللمبه الجاز ... اتباعت
كان إيه فاضل
لاجل تصَدَّق
إنك آخر واحد ينفع ليها
إرحل عنها و سيبها
يمكن
تلقى نصيبها فْ راجـِل
يملا عينيها بْجَدّ
المغاره
فتحوا المغاره
و قالوا خُش
و غـُب منها و انبسِط
شوالين ياقوت و اتنين زمرد
طن عاج
و تسعميت زلعة دهب
خُرج الحمار مش راح يساع
إرجع و هات لك حاجه أكبر
عَبّي فيها حصِّـتك
و هات شارعكو يشيل معاك
الشيله جامده
و انت لما تشيل
كتافك توجعك
حافظ عليها
عشان هتبقى انت الأمير
إصرف على مليون فقير
بعتر فلوسك
ما انت مش تعبان بقى
و كل يوم في بيت جديد
و عروسه حلوه
عيش ... و نام فى حضنها
و الصبح تصحى تلتقى نفسك
ممدد ع البلاط
و بلاش عياط
انت اللى غاوي تنام كده
من غير غطا !!!
زي مين
زي كل الخلق
باصحى الصبح
و اركب ميكروباص
زي كل الناس
باعود آخر النهار
مش طايقه روحى نـَفـْسَها
زي كل حزين
باحِبّ القاسْيَه مصر
و اعشق سِحرَها
زى نـَفـْسي
مش باخاف
من أي لجنه ع الطريق
غير كتير م الناس
لا عمري ف يوم كدبت
و لا افتريت
كل الحكايه اني ابتديت
من كام سنه
ساعة ما اشوف الشمس
باكتم فرحتي !!
-
ليست هناك تعليقات:
إرسال تعليق
أهلا بكم..
أشرف بتعليقاتكم..
محبتى