صورة.. صورة )
مهداة:
الى الثوار الشباب فى بر مصر المحروسة
شعر:
محمود مغربى
……………..
صورة.. صورة
كلنا عايزين ص…
وقف ياعم جاهين ,
دا الصورة دبحوها فى الميادين..
بايد عسكر
واللى سرق قروش الشعب
بالقوة
وبالتزوير
وبيدبح الفقرا على الرصفان
وعافص برجله فوق رقاب الخلق ,
وقف ياعم جاهين
الصورة مفضوحة ع القنوات
وف الفيس بوك
تعال بص وطل
ياحبيب الشعب والثورة ,
الثورة طلعت شمس عفيه
وحراقة ف التحرير ,
حالفة مليون يمين
مايوقف قطارها ليوم الدين
عسكرى
أو مرتشى
طبطب ودلع ولاد ال…
سنين وسنين
مدد مدد
ياكل شبان البلد
ياكل شبات البلد
آدى السما بتمطر مدد
سبحانه ربك خلقنا
وطالع من صلبنا
جيل ورا جيل
قلنا وقالوا
جيل طنش وكبر
اعمل دماغ, روشن
ألله عليك ياجيل النت
ضحكت كتيرعلى بابا وماما
وع العلما
والشعرا
وأهل الفلسفة والدين ,
وطلعت وحدك الشاطر حسن
وع الفيس بوك
بتحوش من سنين وسنين
مهر ست الحسن مئات وألوووووف
وحدك كنت عارف مهرها الغالى
مرهون بقتل الخوف
قتل المخبر السرى
اللى عشش فى قلب أجيالنا.
الله عليك ..
ألله عليك ياعريس الدهشة والثورة
ألله عليك
نزفت كتير على الاسفلت ,
وطاله الروح مئات وألووووووف ,
طالعة بالشهادة لصاحب الملكوت ,
وكل الخلق واقفه تتفرج !
ألله عليك ياعريس
شمعتك قايده ليوم الدين
الثورة دى ثورتك
واقبلنا نكون طوعك
وأتباعك ..
الثورة دى ثورتك
واحنا أتباعك.
10 فبراير 2011
ليست هناك تعليقات:
إرسال تعليق
أهلا بكم..
أشرف بتعليقاتكم..
محبتى