( مين علمك )
للشاعرة حرية سليمان
......................
تحلم ياصاحبى
حلمك ياصاحبى معلمك
تستطعمه مر الشرف
طعمه العفيف من غير ترف
وطن الغلابه المطحونين
لو كنت ناوى بحبها
تصبح شهيد أو تعترف
إفتح لها الشبابيك
وغنى ليها غنوتك
يبدأ حضورك
للحياه إعلان وصولك
وتعلمك
مين علمك
تسمع غناها جوا سجنك
والليل ف قلب الزنزانات مسحور
تتصوره جنيه سمرا
ف قلب بير بتدور
حافظ عليهم دمعتينك
سلمت له طعم البكا
سكر مراره
متخلله عنوان نشيدك
بيحنلك
ويعلمك
مين علمك
منتهى حلمك يكون
شمس طله مالبيبان
ضحكه نايمه بين عيون
سجان جبان
يقتل بخسه فرحتك
من غير ألم
ويعلمك
مين علمك
تقسم رغيفك
لقمه لقمه
بين رفاقك ف الميدان
تنسى نفسك
تضرب كفوفك م الوجع
طعم الدموع
جوا غنوات الرفاقه الطيبين
مصبرك عالجوع
والغريبه مشبعك
ومعلمك
مين علمك
تقطف لها من كل ساعه
تمر بيها ثانيتين
ترسم لها خطوه جريئه
غنوه بريئه تضمها
وتقول لها إنك ياغالى
راح تعود
من صمت بير الزنزانات إرسم وعودك
يمكن تعود
ومن جديد تتوحشك
وتعلمك
مين علمك
تسرق شموسها
المسجنونين الزنزانات
بايدين ولادها المكبوتين
تنسبها ليك من غير ندم
ومن جديد
يتولدلك ألف صبح
بيعشقك ويعلمك
مين علمك
تلمح الطير المسافر
برا قضبان الحكايه
مرتوى شهد الرجوع
منتشى ف براح سماها
فارد جناحه
يمكن بريشه يخلق ميلادك
مالعدم ويخلقك
ويعلمك
مين علمك
تعشق ضى القمر العاشق
نور الفجر
فوق لياليها
يرسم فوق العمر سحابه تمر
زى الحزن مامر
سحابة عمرك تنزف وجعك
عشقك ذنبك
وذنبى إنى سحابة حلم
رافضه تمر
وباعلمك
ليست هناك تعليقات:
إرسال تعليق
أهلا بكم..
أشرف بتعليقاتكم..
محبتى